काठमाडौँ उपत्यका सहित देशभरि हाल जनजीवन क्रमशः सामान्य हुँदै गएको छ। नेपाली सेनाले अन्य सुरक्षा निकायसँगको समन्वयमा सुरक्षा व्यवस्थापनको नेतृत्व लिँदै, उपत्यकामा शान्ति र सुरक्षालाई प्रभावकारी बनाएको छ। जेनजी आन्दोलनका प्रतिनिधिहरू वार्ताका लागि आफ्नो टोली चयन गर्दै तयारीमा छन् भने सडक सरसफाइ अभियानमा पनि सक्रिय देखिएका छन्। आगजनी र प्रदर्शनका क्रममा क्षति पुगेका कार्यालयका कर्मचारीहरू कागजात संकलन, सरसफाइ, संरचना व्यवस्थापन र मरम्मतमा जुटेका छन्।

नेपाली सेनाले निषेधाज्ञा र कर्फ्यूलाई क्रमशः खुकुलो बनाउँदै आवतजावत र खाद्यान्न खरिदका लागि सहजीकरण गरेको छ। भदौ २६ गते बिहान ६ देखि ९ बजेसम्म आवतजावतका लागि खुला गरिएको थियो भने साँझ ५ देखि ७ बजेसम्मका लागि पनि अनुमति दिइएको छ। सैनिक जनसम्पर्क तथा सूचना निर्देशनालयले भदौ २६ गते बिहान १० देखि बेलुकी ५ बजेसम्म निषेधाज्ञा र भदौ २६ गते बेलुकी ७ देखि भदौ २७ गते बिहान ६ बजेसम्म कर्फ्यू जारी हुने जानकारी दिएको छ।

उक्त समयमा अत्यावश्यक सेवाका एम्बुलेन्स, शववाहन, दमकल, स्वास्थ्यकर्मी, सुरक्षाकर्मी, सञ्चारकर्मी साथै खाद्यान्न, इन्धन, दूध, तरकारी, पानी र औषधि ओसारपसार गर्ने सवारीसाधनहरू सञ्चालन गर्न सकिन्छ। सरकारी कार्यालय, बैंक तथा अन्य सार्वजनिक संस्थानमा कार्यरत कर्मचारीहरूले आफ्नो परिचयपत्र देखाएर कार्यालयसम्म आवतजावत गर्न सक्नेछन्। आन्तरिक तथा अन्तर्राष्ट्रिय उडानमा यात्रुहरूले आफ्नो उडानको टिकट देखाएर विमानस्थलसम्म पुग्न सक्नेछन्।

नेपाली सेनाले उपत्यकामा आवश्यक सहायताका लागि नजिकैका सुरक्षाकर्मीहरूसँग समन्वय गर्न समेत अनुरोध गरेको छ। यसरी क्रमशः जनजीवन सामान्य हुँदै जाँदा देशमा स्थायित्व र शान्तिपूर्ण वातावरणको पुनः स्थापना भइरहेको छ।