आसन्न प्रतिनिधि सभा निर्वाचनका लागि नेपाली कांग्रेसले समानुपातिकतर्फ नयाँ अनुहारलाई प्राथमिकता दिने घोषणा गरे पनि लुम्बिनी प्रदेशमा प्रत्यक्षतर्फ सिफारिस भएका उम्मेदवारहरूमा अधिकांश पुरानै नेताहरू दोहोरिएका छन् । अझ गम्भीर कुरा के छ भने, केही सिफारिस उम्मेदवार विभिन्न मुद्दा मामिलामा अदालतको प्रक्रिया झेलिरहेका छन् ।

पार्टीले जारी गरेको आन्तरिक मापदण्ड विपरीत बहालवाला प्रदेश सभा सदस्यहरूलाई समेत प्रत्यक्षतर्फ उम्मेदवारका रूपमा अघि सारिएको छ, जसले कांग्रेसभित्रै असन्तोष बढाएको छ ।

रुपन्देही क्षेत्र नम्बर ३ बाट सिफारिस भएका पूर्वगृहमन्त्री बालकृष्ण खाण भुटानी शरणार्थी प्रकरणसँग सम्बन्धित मुद्दामा विचाराधीन अवस्थामा छन् । कानुनी रूपमा उम्मेदवार बन्न रोक नभए पनि उनी उम्मेदवार बने चुनावी मैदानमा यो विषय मुख्य मुद्दा बन्न सक्ने भन्दै स्थानीय नेता–कार्यकर्तामा चिन्ता देखिन्छ ।

त्यस्तै, नवलपरासी क्षेत्र नम्बर २ बाट सिफारिस भएका नरेन्द्र गुप्ता पनि ‘चेक बाउन्स’सम्बन्धी मुद्दा झेलिरहेका छन् । उनीविरुद्ध बैंकिङ कसुरको मुद्दा जिल्ला अदालतमा विचाराधीन छ । अन्नपूर्ण सुगर मिल खरिद प्रकरणमा २ करोड २२ लाख रुपैयाँ भुक्तानी नगरेको आरोपमा मुद्दा दर्ता भएको हो । गुप्ताले भने मुद्दा चलिरहेको स्वीकार गर्दै त्यसले उम्मेदवार बन्न कानुनी बाधा नपुर्‍याउने दाबी गरेका छन् ।

बाँके क्षेत्र नम्बर ३ बाट सिफारिस भएका महेन्द्र मल्ल ठकुरी पनि बैंकिङ कसुरमा मुछिएको विषय बाहिरिएको छ । उनले भने सबै मुद्दा मिलाइसकेको र कालोसूचीबाट हटिसकेको दाबी गरेका छन् ।

यसैबीच, कांग्रेसको लुम्बिनी प्रदेश कार्यसमितिले केन्द्रले जारी गरेको परिपत्र विपरीत बहालवाला प्रदेश सभा सदस्यहरूलाई पनि प्रत्यक्षतर्फ सिफारिस गरेको छ । रुपन्देही–१ बाट अब्दुल रज्जाक र पाल्पा–२ बाट वीरबहादुर रानालाई प्रतिनिधि सभा उम्मेदवारका रूपमा अघि सारिएको छ । दुवै हाल लुम्बिनी प्रदेश सभा सदस्य हुन् ।

‘युवा र नयाँ अनुहार आवश्यक’

प्युठानकी प्रदेश सभा सदस्य निमा गिरीले कांग्रेसले सबै पुस्तालाई समेट्दै अघि बढ्नुपर्ने बताइन् । तर वर्तमान अवस्थामा युवालाई प्राथमिकता दिनु आवश्यक रहेको उनको भनाइ छ ।

युवा नेता प्रकाश पोखरेलले पटक–पटक अवसर पाएका र विवादमा परेका पात्रलाई दोहोर्‍याउँदा पार्टीप्रति जनविश्वास कमजोर हुने चेतावनी दिए । नयाँ अनुहार अघि सार्दा सकारात्मक सन्देश जाने उनको भनाइ छ ।

नेपाल विद्यार्थी संघका पूर्वकेन्द्रीय पदाधिकारी मुक्तिप्रसाद पौडेलले पनि युवाको क्षमता र सम्भावनालाई बुझेर उम्मेदवार छनोट गरे निर्वाचनमा प्रतिस्पर्धा सहज हुने बताए । तर हाल सिफारिस सूचीमा अधिकांश पुरानै नेताहरू हाबी भएकोप्रति उनले असन्तोष व्यक्त गरे ।