काठमाडौं । चितवनको नारायणगढ–मुग्लिन सडकस्थित भरतपुर–२९ सिमलतालमा लेदोसहितको पहिरोले बगाएको
बसको खोजी तथा उद्धार कार्य सुरु भएको छ ।

सशस्त्र प्रहरीको गोताखोर टोलीले दुर्घटना स्थल पुगेर शुक्रवार बिहान ३ बजे सिमलतालमा गएको पहिरोमा परेर बेपत्ता भएको दुई वटा गाडीको खोजी सुरु गरेको हो । काठमाडौंबाट रौतहटको गौर जाँदै गरेको बागमती प्रदेशको १५१६ नम्बरको बसमा ४१ र वीरगन्जबाट काठमाडौं जाँदै गरेको बसमा २४ जना सवार रहेको प्रारम्भिक अनुमान गरिएको छ ।

यात्रुमध्ये केही झ्यालबाट हाम फालेर बचेको र केही अझै बेपत्ता भएकाले खोजी सुरु गरिएको हाे । सशस्त्र प्रहरीका सह प्रवक्ता शैलेन्द्र थापाले सशस्त्र प्रहरी बल नेपाल १७ गण चितवनबाट ४५ जना र विपद् व्यवस्थापन तालिम शिक्षालयबाट ७ जना गोताखोर सहित २५ जना परिचालन भएको जानकारी दिए ।